Veni Creator Spiritus

 

1.
Veni Creátor Spíritus,
Méntes tuórum vísita:
Imple supérna grátia,
Quæ tu creásti péctora.

2
Qui díceris Paráclitus,
Altíssimi dónum Déi,
Fons vivus, ignis, cáritas,
Et spiritális únctio.

3
Tu septifórmis múnere,
Dígitus Patérnæ déxteræ,
Tu rite promíssum Pátris,
Sermóne ditans gúttura.

4
Accénde lúmen sénsibus,
Infúnde amórem córdibus,
Infírma nóstri córporis
Virtúte fírmans pérpeti.

5    
Hóstem repéllas lóngius,
Pacémque dónes prótinus:
Ductóre sic te prævio,
Vitémus ómne nóxium.

6    
Per te sciámus da Pátrem,
Noscámus atque Fílium,
Téque utriúsque Spíritum
Credámus ómni témpore.

7    
Déo Pátri sit glória,
Et Fílio, qui a mórtuis
Surréxit, ac Paráclito,
In sæculórum sæcula.

Amen.