Te Deum laudámus:
te Dóminum confitémur.

Te ætérnum Pátrem
ómnis térra venerátur.

Tíbi ómnes Ángeli,
tíbi Caéli et univérsæ Potestátes:

Tíbi Chérubim et Séraphim
incessábili vóce proclámant:

Sánctus:
Sánctus:
Sánctus Dóminus Déus Sábaoth.

Pléni sunt caéli et térra
majestátis glóriæ túæ.

Te gloriósus
Apostolórum chórus:

Te Prophetárum
laudábilis númerus:

Te Mártyrum candidátus
láudat exércitus.

Te per órbem terrárum
sáncta confitétur Ecclésia:

Pátrem
imménsæ majestátis:

Venerándum túum vérum
et únicum Fílium:

Sánctum quóque
Paráclitum Spíritum.

Tu Rex glóriæ, Chríste.

Tu Pátris sempitérnus es Fílius.

Tu ad liberándum susceptúrus hóminem,
non horruísti Vírginis úterum.

Tu devícto mórtis acúleo,
aperuísti credéntibus régna cælórum.

Tu ad déxteram Déi sédes,
in glória Pátris.

Júdex créderis ésse ventúrus.

Te ergo quaésumus, túis fámulis súbveni,
quos pretióso sánguine redemísti.

Aetérna fac
cum Sánctis túis in glória numerári.

Sálvum fac pópulum túum Dómine,
et bénedic hæreditáti túæ.

Et rége éos,
et extólle íllos usque in ætérnum.

Per síngulos díes,
benedícimus te.

Et laudámus nómen túum in saéculum,
et in saéculum saéculi.

Dignáre Dómine díe ísto,
sine peccáto nos custodíre.

Miserére nóstri Dómine,
miserére nóstri.

Fiat misericórdia túa Dómine super nos,
quemádmodum sperávimus in te.

In te Dómine sperávi:
non confúndar in ætérnum.